يا ماي بعدك نشربه ياماي .. وانتَ يا مولاي
عالثَّرى ** تنادي يجدِّي العطش فتِّ حشاي .. و ونَّتك بهداي
ولا خجل** روج النهر لي هسَّا رايح جاي .. يا رخص دنياي
العلگمي العذب كونه علگم

تستغفر لأمثالي بأحسانك
مولاي و انتَ يابس لسانك
يا مكثر سهامك و اجه يكمّلها ذنبي
أكو خادم لاچن يزِل واكو خادم بأستقامة

تاخذ إساءة احسان تنطيني
و أدري المعاصي لوِّثت طيني
و خوفي الذنب يبعدني عنّك تالي دربي

أكو خادم لاچن يزِل واكو خادم بأستقامة
أكو من يدعي لإمامه و أكو اليدعي له إمامه
أكو مثلي , و أكو مثل الصَّائِدي أبُو ثُمامه
لحظة ما ضيَّع صَلاته حتـى لا يضيِّع غرامه

گلبه ويّ الآذان .. و هوَّ بگلبه السهم
و المثلي الغرگـان .. مد لك إيد الندم
و حاشا تـرد يمناي .. فأنْتَ يا مَوْلاي
عادَتُكَ الإحْسَانْ .. وَ سَجِيَّتُكَ الكَرَمْ

اجعَلْ قَليلي هواي .. فأنْتَ يا مَوْلايْ
عادَتُكَ الإحْسَانْ .. وَ سَجِيَّتُكَ الكَرَمْ

يا ماي بعدك نشربه ياماي .. و انتَ يا مولاي
من الرَّمل ** مجمِّع وسادة و الرَّمل چـــوّاي .. من عمت عيناي
بالشَّمس ** و غير الخيول عليك ماكو فياي .. شلون ابطل بچاي
و ما أوفي لو أبچي من دم

يا مدمع اليوفيك يا مدمع
تلملم شتاتي و جسمك موزَّع
المثلي فلا عنده عذر و يگول عُذراً

لي هسَّا خيرك تارس چفوفي
شكرًا الك مولاي ما توفي
و چلمة الـ شُكرًا هيَّ هم تحتاج شُكراً

مو فقط بلساني شكرًا , شكرًا بكل الجوارح
شكرًا بغضِّ البصر لعيوني ودموعي السوافح
شكرًا بسدِّ المسامع - إلّا عن صوت النوايح
أشكرك حتّى بخيالي بغيرك الما يوم سارح

راسك عالمُرَّان .. و نحرك ينزف نعم
حنَّان و مَنَّان .. حتّى بحرگ الخيم
ولا عجب من هاي .. فأنتَ يا مولاي
عادَتُكَ الإحْسَانْ .. وَ سَجِيَّتُكَ الكَرَمْ

اجعَلْ قَليلي هواي .. فأنْتَ يا مَوْلايْ
عادَتُكَ الإحْسَانْ .. وَ سَجِيَّتُكَ الكَرَمْ

يا ماي بعدك نشربه ياماي .. و انت يا مولاي
بالعطش ** و شفاك ما تتلاگى هاي و هاي .. و آنا ابِـلِّ شفاي
و النهر ** انطاني سِگا و منكم أخذ سگّاي .. و زينب بلا راي
و خيَّم المسا بلا مخيَّم

كل عين كون دموم تتفجَّر
و إختك يحبل الله بحبل تنجر
يمرّون بيها على النّهر وتشوف مايه

تشوف الگمر عالشاطي متواري
عباس راكد و النهر جاري
وهوَّ الفرات الواقعي اليروي الظمايا

من أدب ساقي العطاشى الناس تتعلَّم أدبها
دومه مستحضرك يَمَّه و رفعته هاذي سببها
من نزل ماي الشريعة شلون بأفكاره حسبها
چانت الشربه مُباحة و اغترفها و ما شربها

اليـدوِّر عرفان .. بس عند راعي العلم
و من جود العطشان .. رايد غرفة شيم
إسگیني أدب مو ماي .. فأنْتَ يا مَوْلايْ
عادَتُكَ الإحْسَانْ .. وَ سَجِيَّتُكَ الكَرَمْ

اجعَلْ قَليلي هواي .. فأنْتَ يا مَوْلايْ
عادَتُكَ الإحْسَانْ .. وَ سَجِيَّتُكَ الكَرَمْ