نوينا نجامل ونتغاضى قدر الامكان
لكن البجاحه داء و ازرى مداويها

نخلي المجامل دام وقت الحقيقة حان
وهي بينّةً مافيه حاجة تغطيها

فاذا جاتنا من بعدها شرهة الزعلان
نشرنا لكم وش هي و ويش اسم راعيها

قبل لا يجي وقت الحسم والمواجه كان
عموم الاوادم طامعه في هقاويها

ويوم أكّد الموعد حفيد البطل راكان
معد عينّت بعض العرب ما يجرّيها

نزل كل صامل ب اسم ابوه .. و خلى الميدان
من اللي يدور له معاذير يشريها

من يجابه ويخسر ف هو والله الكسبان
ياطيب الشجاعه يا النشامى وحاضيها

تراه ادمي واحد بلاه الله ب طوفان
من اللي يلومه لا هرب وانثنى فيها

وعليها العرب صارت تعرف اشجع الفرسان
لا شاف الكتايب ساقته رجله اليها

وفوز الدسايس لو روى لهفة [ العطشان ]
تحقره عليه البل وتحقره اهاليها

بلا رحمه الرحمه ما عادت تفيد الان
نبيه يتمنى الموت قدّام يثنيها

ونبي نجعله عبره.. تمثّل به العربان
عن اللي طمع في قوة ما يقاويها

لا جت بالتصاريح ف ترى كلنّ اله لسان
تقاس الاوادم من وقايع يمانيها

ونبي نخطر الملاك من مختلف الالوان
مع حفظنا الكامل لتقدير اساميها

على اشواطنا لحد يوسوس له الشيطان
ف يزلق لوديان الجحيم وبلاويها

ومع سيطره الاموال واهل التجارة بان
من اقصى ديار البدو رجال يكفيها

تقّدم محمد معه بندق وحد سنان
وساق الغنايم للبدو في مفاليها

يسوقه على دحم النشامى سطر وجنان
من الصفر واخصامه تزاحم مخابيها

وقالو طبيعي دام له سالف وشيبان
عطونا المزاين قبل نسمع بطاريها

ومن بعد ما حول عليهم صقر شهران
معد شفت لي ناس تنفّخ علابيها

عوايد جدودك تضرب الخصم في الحجّان
ومن كان عنده عادتن ما يخليها

نثق في حكم من مرجعه سنة وقرآن
وفي نظرتك في البل وفي نقوتك فيها

على كل راعي فوز لك راي يا زومان
وصرت آمر اصحاب الاوايل وناهيها

يلين الحجر ويذوب وابو حسن ما لان
يدك الخصوم ولا خلص ما يحاتيها

واذا صافحَت يمنى محمد ولد سلمان
تنقّى تبي يمنى سنافيٍ تجاريها

ومحمد خذا التكريم والفوز بالذرعان
وباقي الوسايل والطرق ما يدانيها

تجيه وتحصّله انتحاري يسد الشان
ويجيك يتقصّى للحوايج وينهيها

خلايا الحمايا عنده تزاحم الشريان
ياليته لا خالط باقي الخلق يعديها

لا جيته لحاجة مستحيلة على الانسان
بيقضي على نفسه على شان يقضيها

وحنا شهران اهل السطر هيبة الحدّان
على الحد نارن ياكل القلب صاليها

من الغطرسة مدري الثقه غالب الاحيان
نهيب العدا بالغزو من قبل نغزيها

يجينا على كسب المواقف وله و ادمان
خصوصا لا ذلو الناس من علم داعيها

ورثنا الشجاعه طبع من سالف الجدان
ما دام العمار قصار والموت قافيها

لا ضمْيَت جبال الحد في مملكة سلمان
وغاب المطر قمنا من الدم نرويها

Sample comments about this video

"تبارك الرحمن ياخالد البريك كل قصيده يعطيها حقها والشيله ذي مليوووونيه ❤وصح نقل الروقي ششيلاتك فخمه"

"سبحان الله الحمد لله لا اله إلا الله الله اكبر لا حول ولا قوة إلا بالله استغفر الله العظيم واتوب اليه سبحان الله وبحمده سبحان الله العظيم لا إله إلا انت سبحانك إني كنت من الظالمين اللهم صل وسلم على نبينا محمد وعلى اله وصحبه اجمعين ."