الليل توه بدى والنجم جاله شعاع
ولا ودي الشمس تستعجل على شروقها

دن المعاميل واحذف من خشيب التلاع
لين اقطم البن الاشقر يستوي فوقها

وزله على اللي تضجور من لهيب الولاع
لو تنجلي بالذهب مايظهر حروقها

هدفاً لا ساح العويدي في نحرها وماع
اضرم على كيفها من قبل لا اذوقها

فنجالها اللي لاصكيته يصك الصداع
يشفي جروح الضمير و ينعش عروقها

سج القدم و النسايم والحطب والشراع
ودهم المخايل لا قامت تكشف بروقها

والبل ليا من جنبها فاض مع كل قاع
والبدو عقب الوسامي جاتك تسوقها

ومطامن العشب شابكتن بروس الرفاع
يضيع فيها الولد من طول زملوقها

منوة دريكً مع الدنيا يعيش الصراع
يرفى طعون الزمن و يخيّط فتوقها

اليا انعزل من يحب الناس والاجتماع
تراه من دمعتن تبحث خفى موقها

ماودّع الضحكه الا عقب يوم الوداع
وضلًوع صدره يتل الشوق معلوقها

تغانمي مابقى يام العيون الوساع
بلاش من سالفة ليلى و معشوقها

قصايد الوجد شرهتها على الامتناع
باحت بيوت الغرام وشابت طروقها

والهاجس الطرب عن وجهه يشال القناع
لازان درب المدايح زانت ووفوقها

انا من العام اسولف عن طويل الذراع
زحلً زحول العرب مايجهل حقوقها

ياجعل قصرً على جابر رفيع الرباع
فوقه مزون السحاب تصب غدروقها

نوره لاشغل مع المغرب يدل الضياع
ومضايفه للضيوف وساعً حلوقها

تشيل جمع القبايل من جميع البقاع
وتحوم فيه الحرار و تطلق سبوقها

فعلك يجري يابن سبعان سحم السباع
حتى لاون السباع تبين فروقها

واسمك مقر الفخر والمجد و الارتفاع
ومن عزوتن ف الملاقى تحتمي نوقها

قسم الموازين تاريخً يفض النزاع
يوم ان بقعا ملز الخيل موثوقها

وطلال عقب الصتيمه والعديم الشجاع
اللي يمينه عسى ماتشتكي عوقها

ينفض ملايينه اللي في بنوك الايداع
اليا لقى له غزيزً تنفض شدوقها

صمخ البداوه من الحقه يالين الرباع
صفرن العبدان الاول ترجع عموقها

ارخص عقار الرياض وكل صكً مشاع
يضرب على البورصه و يفك صندوقها

في شف نوطاً تقول تهوم طلعة رفاع
وازين مافيها تلذعها وسمحوقها

شويره اللي يتيه كل بكرً زعاع
لا طب سوق النوادر يحتمي سوقها

مشعل و مشعل ولد مسند حميد الطباع
القمه المتعبه من فوق شاهوقها

اليا هرج هرجته يصغى لها الاستماع
ويش الرياجيل لو لا زين منطوقها

واصطى من الهيج لا هاب الجبان الرعاع
لا قال انا عاقل ( العوبا ) ومطفوقها

عند الحمايا مثل شهب الذياب الجياع
تقلط على ام الشحم يمناه وتحوقها

واللي ماهوب لبني عمه وزارة دفاع
الشجره الميته يشره على عروقها

Sample comments about this video

"ياسلااام اليا انعزل من يحب الناس والاجتماع تراه من دمعتن تبحث خفى موقها"

"قال رسولُ اللهِ صلى اللهُ عليه وسلم: ‏خُذوا جُنَّتَكم من النار، قولوا ‏سبحان الله، والحمد لله، ‏ولا إله إلا الله، والله أكبر، ‏فإنهنَّ يأتين يوم القيامة ‏مقدِّماتٍ ومعقِّباتٍ ومجنِّباتٍ، ‏وهنَّ الباقياتُ الصالحات"

"{يَقُولُ يَا لَيْتَنِي قَدَّمْتُ لِحَيَاتِي} ‏استثمر دقائق الانتظار بالاستغفار، ‏املأ فراغك بذكر ربك، ‏لا تترك ثانية من عمرك أو دقيقة حتى تنتفع بها ‏استغفر الله العلي العظيم واتوب إليه"