على الكويت الله يجيبك ياسحابٍ لـ انهمر
قامت ملايكته تسوقه فـ اجنحتها دار دار

ياخذ ثلاث ايام دون الشمس ماكف المطر
تقول حجاجٍ جمعها الله على رمي الجمار

كن الرعد لاحن فـ اطراف السما شق القمر
والبرق كنه خاطفٍ نوره من اطراف النهار

وكن الخباري مع طريق العبدلي مثل البحر
سبعين كيلو والخباري من يمين ومن يسار

والناس كن اليوم هذا يوم من عيد الفطر
تجمعوا حول المزون الذايبة مثل السوار

ولاراود الذكرى وهيضها على القلب الخضر
ألا جلوسٍ في طرف سيلٍ على اطرافه خضار

واللي طرى فـ بالي من أجمل ماخلق ربي بشر
ماراح تلقى مثل وصفه فـ الابل ولا المهار

لو في عيونه يستظل الريم ويطير الصقر
لاشفتها يضيق فيك الجو وتضيق القفار

لكن ذا الليلة تراها غير ياطوال العمر
ذي ليلةٍ عندي من ليال الوفا والافتخار

يامرحبا ومعزب الضيفان يرحب من عصر
ترحيبةٍ من طيب راس معزبي تقدح شرار

تقول صوته كل مارحب على باب القصر
رصاصةٍ تطلع من حلوق البلاجيك القصار

واقف ولاهمّه بشوت الصوف وبشوت الوبر
وبشته من بشوت المعزة والمراجل والوقار

من دون وجهه ماعليه من الغنى ولا الفقر
ماشال هم المصرف وماشال هم الادخار

وذكره على شبه الجزيرة كل ماجاله ذكر
أغلى من أسعار الذهب وأغلى من أسعار العقار

هذا محل العز والناموس والمجد الأغر
مدهال شمطان اللحى والمدح وطوال العمار

هذا حفل شريان ابن عبدالعزيز وذا مقر
العود الأزرق والدلال الصفر وصحون الفقار

كن المقهوي والدلال اللي على أوجاوره عشر
عساكرٍ مستقبله ضيف الحكومة فـ المطار

لاجاك فيها كل ماخذها من اطراف الجمر
تقول صقارٍ على كفه من الشقر الحرار

والعود الأزرق من كبر جرمه تقول انه سمر
ماعاد يحطه بالمباخر قام يحذفه بالوجار

مايشتري بالسوق غير أكبر حجم وأغلى سعر
وهذي سوات العود لامن طاح مع شباب نار

ياعزوة الشريان لاطال المديح ولاقصر
حنا الكبار ولامدحنا بالعرب غير الكبار

أنتم هل الشرفا وروسٍ ماتعرف ألا الظفر
كواكبٍ تطلع على التاريخ ومطير المدار

يوم العرب تاخذ بعضها وأنتم الموت الحمر
مايوخذ حوارٍ من الابل عاد خل أم الحوار

عدوكم لاطاح فيكم راح مارد الخبر
ودخيلكم يلقى بكم فزعة و رد الاعتبار

واليوم ياشريان جيتك بالشعور وبالشعر
ياخيرة الاسما الحقيقية والاسم المستعار

الشعر صورة وأنت ياشريان تفداك الصور
يوم ان غيرك لاهو بالصورة ولاهو بالايطار

حتى الشعور اللي يروادني أشوفك فخر
وأصحابك الغالين تفخربك وعدوانك تغار

لاتلفت باللي مديحه بالسناب وبتويتر
أجلس على شدادك ويجيك المدح من كل الديار

Sample comments about this video

"مبروك شاعرنا على الزواج عسى ربي يجعل السعاده ما تفارق خطاويكم 🎉😍"

"يستاااااهل شريان والله انه يستاهل كل خير وعسى ربي يوفقه في حياته ويرزقه بالذرية الصالحه ❤ ياشريان نحبك ❤"