بحبل ادينا . من مشينا . كل دربنا كربلا
الغاضرية . وآل امية . والخرايب والفلا
عذبنّي . وهذا ونّي . مابقيت مدللة

سفرتنا كلها تشابه العاشر
طف بكل وكت حاضر . وانا انوح

ليليّة اشوفن روس ولياني
فوگ رماح عدواني . وين اروح

اهات وي كل صبح
راسك فوگ الرمح
يشرق مثل الشمس . حسين

نتصابح والهزل
منظر ماينحمل
نبچي بعزّة نفس . حسين

دربي هيمة . وچم يتيمة . طيّحوها من الهزل
من صفية . ومن رقية . گلبي خيمة ومشتعل
موت اخذهن . وبدفنهن . بيدي فلّيت الحبل

هواي المصايب وانا مابيَّ
دفن علوية علوية . بالتراب

درب اليسر سوّاني دفانة
دفنت بنيّة عطشانة . ياعذاب

رشّيت فوگ اللحد
ماي وچان الورد
ميت جوّه الترب . حسين

مابين گبر وگبر
يحسين ضاع العمر
غربة وانت بغرب . حسين

بهيدة نحچي . وسكتة نبچي . بالخرايب والدرب
والتگلّي . عمة فلّي . حبل اديَّ تنضرب
ماكو رحمة . والـ يعمّة . من رقية دم تصب

ياعمة اگلها تحملي تگلّي
فلّي حبالهن فلّي . چفوفي هاي

ياعمة اريدن ماي اودّي له
بحبل ما اگدر امشي له . وبيدي ماي

مايشرب لو سما
تمطر يم مبسمه
لو شاف بيدي حبل . حسين

يجرحني وينجرح
يذبحني وينذبح
رمحه وظهر الهزل . حسين

من سبونا . عذبونا . وانهضمنا من السبي
والهضيمة . كل يتيمة . تگلّي هذا مطلبي
تريد ابوها . ومن يجوها . تضم حجيها بالعبي

راسه بقنا ويتلفت هوايه
من يسمع هالحجاية . بابا وين
بجرحه وتجي من كل كتر بابا
من الهزلة من الترابة . والانين

يوگف كل ماسمع
يحسين واحد وگع
وشكبر النايحة . حسين

لو بيده من الرمح
ينزل دمعة وجرح
ويشيل الطايحة . حسين

بالخرابة . عالترابة . گعّدونا باليسر
بيها بتنا . ومر وكتنا . بس مدامع للفجر
ومن اجونا . ذكّرونا . بالمخيم والظهر

صوت وسياط وي الحچي يحومن
گومن للقصر گومن . وانا اصيح

من القصر شو گلبي لاجمني
شياخذ هالقصر مني . ياجريح

بباب الديوان اظل
ساعات من الخجل
ويذبحني المستحى . حسين

ولو گالوا خارجي
يوم العاشر يجي
ونشاهد مذبحة . حسين