اخدم والطم وامشي واقاوم واعرف رايح وين
انا بنادم كلشي العندي من خيرات حســـــــين
ما ارتاح تعب الخدمة واهس
انا انسان ربّتني المـــــجالس
______
يمشكات الغياهب.... يصاحب واحلى صاحب
ضلام الدنيا لو ما.... شمــــــس هاي المواكب
عزائك مالي غيره... على الله واعلـــى خيره
انَه بليّاك احــــــــسّن..... شخص ماله عشيرة

انا ابنادم رُبه بعزِّك رُبه ابفيّ احــــــــــتوائك
انا الطير اللّگى اجناحه ٱيتناسب وي سمائك
يتعّبني حچي الدنيا واجي ٱرتاح بعـــــزائك
الأمان ابّيتي ماحصـــــــله الأحسّه بكربلائك

ماتسوة الدنيا بلا حزنك يالحزنك توفيق
ذِلّة ادموعي اتهلّ لغـيرك بس للطف تليق
مو أيام أيامـــــك مدارس
انا انسان ربّتني المجالس
_______
لگيتك راية خظرة.... حزن مبني اعله فطرة
يالمقدّر دمــــوعي..... حمامات اعلى حظرة
تعب لاهوتي تعبك.... يهنياله اليحـــــــــــبّك
على الماي اكتب اسمك... اگولن بلكي اشَربَك

عجيب امــــــرك يبو الأكبر يمَن حِزنك عِبادة
فقط بس عالَمَك بيه البُكا سِـــــرّ الســـعادة
امن اشوفن خيرك اتعجّب على اليجهَل مُراده
التَرَك طِبّك يبو سكينة ولزم باب العـــــــيادة

يحسين اليشرب من خيرك يلگى الدمعة هواي
من يعطش والمــــــــــاي ابصفة مايهتم للماي
كلشي وياك من يعطش ينافس
انا انسان ربّتني المـــــــجالس
_______
يعكّازة صلاتي... يالمســــــيّر امنياتي
اذا مابيها حُبك... شنو الخير بحياتي
يگلّولي شعلامك... وانَه امچــوّة بسهامك
قصور الدنيا يمّي ... وانَه عيوني لخيامك

حَنانك ماشـــــــــــفت مِثله ولا مِثله يمرني
البشر تعبرني بس انتَ اَمن اطيحن تنتظرني
أكـــــــو مابينك وبيني شبه لاسمك يجرني
ابوي اعـــــــتبرك وانتَ إبنكم تعـــــــــتبرني

يافتحة عيني ويا واهس بين ادموعي اينام
وين ايروح الماتنطـــونه امچان وي الخدّام
من اصباي حبك بيّه هاجس
انا انسان ربّتني المـــــجالس
_______
حچي الحُر طمّعاني.... برحمتك رغّباني
الهلا اللاگيته بيها.... خذَتني مِـن كياني
أجيتك مِن ضَياعي... دمع عيني مِــــتاعي
سفــــينة وما أريدن.... سِوى عيونك شِراعي

خدمتك ترفع ابنادم تميَز اســــــمه اعلى جيله
اليطيح ابدربك اترجعه جبل يمشي اعله حيله
اريد امشي اوي خِدّامك يبو الخـــدمة الجميلة
لإن كل (خِل) يقيّمونه وفــــــــــــق رتبة خليلة

شفت الحُر واعيوني اندارن صوب اخيام النور
ياوحشة عمرة الما يترس روحيته بعاشـــــــور
بس عاشور لجروحي يلامس
انا انسان ربّتني المـــــجالس
________
أحبك مو بديه... يحبك كلشي بيّه
اناْ الطينة الأصلها... أديم الغاضرية
ترة الحُب ماهو كلمة.... مُـــــقدّس لليفهمه
الوصل عِشبة محبتك... تصبّ اسمك على اسمه

اشكرك نبّهت گلبي وسحبته لفيّ طفوفك
اشكرك ماتهد چفي اذا ٱهــــــدّن چفوفك
اشكرك يالتذكّرني اذا لحضـــــات اعوفك
اشكرك ماعفت عيني جرح عابر تشـوفك

گلگامش كل عمره ايفكّر يخلَد عالي الصيت
چا ضل خالد بالعز كونه امچلّب باهل البيت

صيته ايضيع من نحچي اعلى عابس
انا انسان ربّتني المـــــجالس

Sample comments about this video

"نداء من بريطانيا 😢 خيرات الإمام الحسين 😢ع عظم الله لنا ولكم الاجر 😢 😢مولاي ربي يحفظك ويوفقك مدين يارب العالمين 😢"

"ماشاء الله ملا مدين كل التوفيق الك بحق محمد وآل محمد الطيبين الطاهرين 🌷🤍"

"الشاعر كاظم الحولاوي شنو من بشر تحطه باي مكان يورق ويثمر شاعر ومهوال ورادود وناعي وملا منبر حسيني"

"واللة طالع لزيارة ومشغل قصيدة اخر ليلة لم عون طول الطريق بلسماعات اكبار مشغلهن والزوار كلهة متفاعلة وي القصيدة اللة يوفقك"

"الله الله اجمل قصيدة جنت حاضر بل مجلس كله روحانية الله يحفض القايمين لمجلس ويتسر عليهم كله طيب واخلاق ❤"

"الله الله ملا شهالقصايد الله يزيد توفيقك بحق الحسين الشهيد اجرك ع الحسين(ع) إن شاء الله"

"شكد احب هذا الشاعر كرومات والله❤ الله يحفظك ويسهل لك في خدمه سيدي ومولاي ابي عبد الله الحسين"

"السلام على الامام الحسين وعلى ال الحسين وعلى ابو فاضل العباس وعلى اصحاب الحسين ورحمة الله وبركاته"

"موفقين انشاء الله بارك الله بجهودكم ووفقكم لخدمة الإمام الحسين عليه السلام"

"ما شاء الله هذه القصيدة مُتميزة كما هو حال الإلقاء وفقكم الله تعالى"