مانلد العين - خالد ال بريك & احمد عبدالله - هامت وقدت قميصي ونادتني تعال 2027 - كلمات الأغنية / Lyrics

ما يونس خاطري غير نسناس الشمال
مع هبوبه تنجلي كل ضيقه وغلقه

إن قبست النار بين الحقيقة والخيال
تاكل من أطراف كبدي همومٌ مرهقه

ما نلدّ العين لا كبرت بشمّ الجبال
إن وطيت الضلع من هيبتي راح مرقه

لا فهقت عمامتي لا تزيدون الجدال
اتركوني يوم أغنّي براحة مطلقه

اسقني من عذب قرهودك الخمر الحلال
لين يلهمني بسحر البلاغة وأنطقه

امتهنت الشعر، وأسرفت، وأحرقت المجال
ساحة الإبداع شبيّت فيها محرقه

هامت وقدّت قميصي ونادتني: تعال
لا ترادوني، ونفسي عليها مشفقه

مير ما عاذ الله أظلم، ولله الكمال
والله إن الزين يتبع، وكلٍّ يعشقه

ما معي سلطة ومال الوليد بن طلال
مير وجهي حي، والروس ماهي مدنّقه

صبّوا الفنجال الأشقر من اعذاب الدلال
أرْهوا الكيف اليماني، وأنا قدّ الثقه

يا عمر، قوّاك ربي، وحفلك كرنفال
النشاما تدهله، والحظوظ موفّقه

فالمباخر يكسر العود لزحول الرجال
وأنت طيبك عودٍ أصلي، وجدّك عتّقه

من نهار المنسلة يوم للخيل اجتوال
لين أبوك اللي من الجود كفّه مغدقه

يا ولد عميّ وميرادنا العدّ الزلال
لين أصدّرها على أهل القصيد معلّقه

احذف الغترة، وشوّش، وطوّح بالعقال
اكسر اللي تكسره، وافهق اللي تفهقه

مجدنا تاريخ، وأفعالنا مضرب مثال
ما خذينا العز منحة شيوخ ولا صدقه

إن جرحنا نجرح أكبود ونهين الريال
لا عطينا نطرد الفقر حتى نلحقه

لا دجرنا واعتزينا وسقناها عدال
قسمنا بالكوم يا اللي تغرف بملعقه

من يصادمنا نحدّه على الجرف الهيال
كم خصيمٍ قد نوانا وأخذنا بندقه

إيه حنّا كعام خشمه، وفي عينه خلال
إن بغينا ناسمه، وإن بغينا نعتقه

ما نقول إلا عسى الله يصلح كل حال
من جهل بالصقر يشويه، ولا يسلقه

يوم دقلات السبايا وزرفال الجمال
كم عقيدٍ فوق راسه ينكّس بيرقه

ربعنا اللي صيتهم من قديمات الليال
الحقايق ثابته والعلوم موثّقه

انشد وتلقى الخبر مع مداغيش العيال
احددانا يوم وقت القشر والتفرقه

وانشد التاريخ يكفيك عن كثر السؤال
عن بني ميمون وش قال أمير المنطقه

روس ميمون الدواهي مخضبة السلال
يشهد التاريخ باللي ماهي بملفّقه

مجد حمران النواظر عريق ولا يزال
فعلهم نوماس والعز شمسه مشرقه