البارحه ليلي مثل سالم الزير
نفسه على شيبان دوم مغبونه

يحس في صدره سيوفٍ بواتير
في ليلةٍ والحزن غطى عيونه

ودقيت سلف الي يعشق المشاوير
ماني من اللي فالحما يدرجونه

من وارد امريكا بلوحات تصدير
يشبه ظلام الليله بديه ولونه

ذاخره في وقت الليال المعاسير
في لازمٍ يصعب على الي يجونه

يطري عليه كل ما اعدي سدير
قبل ٣ شهور لي يذكرونه

مايدري انه كل ماغرد الطير
هيض على الشاعر وغنى لحونه

اسمه يجي بين السهر والتفاكير
في نشرة الأرصاد هم يعلنونه

ياخالد الزعاق مسيك بالخير
عطنا علوم الوسم للي يبونه

لابكر الوسمي وفي حزة عصير
برقٍ من المنشا ترادم مزونه

كلٍ على شوفه يسوق التباشير
يشعى قلوب البدو ويخايلونه

يأخذ ٨ أيام وبله شخاتير
على جميع الدار مرخي متونه

يفرح به العساس واهل التصاوير
والي هوى ذيدانهم يتبعونه

في شفها ماحسبوً للمخاسير
المال لاجل عيونها يرخصونه

لي صاحبٍ دونه مااسوق المعاذير
خوة وفا ماهي بخوة مهونه

في المجمعه بيته مثل كشب والنير
ماحركة صفق الهبايب ركونه

عون الرفيق وريف كل الخطاطير
بيتٍ يذري كل من يدهلونه

فعلك يابن وارد محمد ترى غير
طاريك مثل سهيل مايجهلونه

لأنك وريث الي تدك الطوابير
دخيلهم وقت اللقى يحتمونه

لاد الجعيد أهل الفعول المشاهير
تاريخهم بافعالهم يصنعونه

من مدرسة وارد معزه وتقدير
ذكره سطع كل الملا يعرفونه

ولانساك ياخالد حفيد المناعير
قرمٍ ينومس كل من يمدحونه

لأنك حصان وسطر المجد تسطير
مجدك يابن صالح ترى يسمعونه

ربعك شيابين الفخر والسعاطير
واللي يجاريهم يبى يتعبونه