على راس مزمومٍ بدا قافي و معناي
وقلبي اهمومه تازن طويق و هضابه

يجر الحنين عروق قلبي واجر خطاي
على مرقبٍ من لاعه الشوق يرقابه

كوت قلبي الذكرى وزاد الهوى شكواي
وجرح المحبه جرح ماتوجد اطبابه

ماغير اتوجد كل ليله على ليلاي
وجود الشجيع اللي فقد خيرة اصحابه

نديمي دجى ليلٍ تجلى على قمراي
وشعرٍ لعل ان ازرق الدمع يهدابه

طروق الهوى ماترحم الشاعر الغواي
مداهيلها لا خـيم الليل تنتابه

لاجته الطواري صاخبه ذيبها عواي
غدى كنه اللي مقفيٍ ينقل صوابه

يجوب البسيطه والطواريق رايح جاي
و بينه وبين الهم غارات و حراابه

وانا لو من عدود الغلا ماقطعت ضماي
ابشفق على قلبٍ غدى الهم جلبابه

قضى العمر ازيف ضحكتي للزمان الجاي
وادله فؤادٍ جمر الاشواق يسطاابه

والى عسعس الليل وطرالي غرام مناي
تمادى الحنين اللي رسابي على بابه

خياله يجيني كل ليله مع مسراي
صويب المحبة مايجرد من احبابة

وقـايع فراقه كنها طلقة الرماي
ليا من رمى قلب الهدف والهدف صابه

اكف الدموع الزرق واصبر على بلواي
وهو من على ريع الهجر يشعب ركابه

انا لو من دروب الهوى قد طويت رشاي
غرامه ليا طرّي نهب قلبي نهابه

حكمني غرامه حكم يفرض علي ولاي
وبايعه قلبٍ حكم الاحباب يرضابه

سقى الله يوم اسهرت عيني على مركَاي
مع من ربطني ب الغلا واعلن غيابه

ابنسى غرامه مير قلبي ماهو نساي
ليا زل ثلث الليل يشفق على احبابه

عجزت اتحمل مر صبرٍ يجيب اقصاي
ولا اطيق مر الصبر لو كان به ثابه

بعد زمله سلم القبايل وضاع جداي
وجاه النصيب اللي خذاه وتنحابه

سمحت وقنعت من الهوى واستوت دنياي
وفي عيني اضحت كل الايام تتشابه

لو ان الزمن جاني على كيفي و مشهاي
ماضاق الصدر و الكون ماضاقت رحابه

على كثر ماصادم ليالي عديمة راي
اشوف الامل في رب ماخاب طلابه

عسى مقبل الايام تصفى مع شرواي
و يسلابها من لافه الهم و اومابه

وعسى البارق الشعّال والراعد الدوّاي
مزونه على مرتع دوا الروح صبّابه

Sample comments about this video

"حين تجتمع جزالة الكلمة مع عذوبة الصوت، تكون النتيجة إبداعًا لا يُملّ سماعه. شاعرٌ أجاد، ومنشدٌ أبدع، فخرجت لنا تحفة تلامس الذائقة وتأسر القلوب"

"شاعر وابيات ومنشد ولحن كفو .. يما تكون الشيلات كذا ولا فلا ."

"قسم بالله الشيله ذي المفترض تطلع ترند ترفق ال100 مليون مشاهد ياخي ابدااااع بمعنى الكلمه 😔"

"روووووووووعه كلام ولحن وصوت عمل من زمان ماسمعنا زي الابداع هذا"

"كل شخص يشوف التعليق يدعي لي بالتوفيق والرزق والزوج الصالح 🙏🏻🤎"

"انا في وجه الله على إبدااااااع 🎉🎉 وأبيات جزله أستمر لا خلا ولا عدم"

"ظاهرة الشلات ابن دلبج، كلما ظن جمهوره انه أشبع ذائقتهم بشلة جاء بشلة جديدة أفضل وأجمل..لله درك"

"ابداع يبو دلبج وصح صوتك عمل جبار وان شاء الله المليون"

"ماشاء الله تبارك الله ابداعع اول مره الحق على شيله في بدايتها😂😂😂"

"صوت محمد ال دلبج هو المتخصص الوحيد الذي يقدر يطرب اذني وخاص اذا الابيات جزله مثل ذي"