ياروحي لو هيج العشك لو ما اريده
هوه حلاته الحب اذا تچويني ناره
قفلنه بيبان الگلب يعني بعيده
واحد يفوت الگلبي ويغير قراره

بعد ماكو عشك يجيني واقتنع
اذا عندي الشمس شسوي بالشمع
احبك بالفرح واحبك بالدمع
واحبك بالنفس لحد ما ينگطع

روحي.. بعيونه تهم
روحي.. حب لليفتهم
روحي.. عباس الشهم

روحي.. كلشي عافته
روحي.. اوعشكت رايته
روحي.. روحي سمته

يبو الحب والوفه
يهدوه اوعاصفه
اذا انته غبت
عله الگمره العفه

يعافيت الدوه
يماخذ عالضوه
اذا اشم رايتك
شسوي بالهوه

بالگلب واحد
انته بي گاعد
بالنفس ماتنزل انته
صاعد اوصاعد

هايه حياتك ياگلب سوي التريده
لاتلتفت للوادم التحجي علينه
سامعهن اوهاي السوالف مو جديده
مايتلفت لليغرگ اشراع السفينه

المشه ابدرب العشك يحس بي مو سهل
يضل گلبه يدك گبل لاينسأل
العمه عيونه الك يريدك ماتزل
تره البيهن سهم يشوفنك عدل

عيني.. ماشافت بشر
عيني.. ينحب عالصور
عيني.. ومفهي الگمر

عيني.. ماشافت مثل
عيني.. وجه ابو الفضل
عيني.. الميت والعدل

يدگات الگلب
يواهس كل درب
اذا حب مو الك
شني ايسمونه حب

يواحد لاجذب
يمن ماتنحسب
العذب من جسته ضل
يسمونه العذب

تفرح عيوني
من يلوموني
انه اضل كلش احبك
من يضدوني

يافرحت عيوني الطبع طيفك عليهه
كل غالي عندي يمك اولاشوفه غالي
ماشافتك روحي اوصرت بس انته بيهه
وانه الشفتهم ما اجو مره اعله بالي

شفت ياما شفت واحسنهم غرب
يلوحون الجفن ولاحس بالقرب
عكسهم يالصرت ضواي ابكل درب
احسك بالنفس واشوفك بالگلب

بيدك.. ياعشك الزغر
بيدك.. سلمت العمر
بيدك.. وعيوني نذر

بيدك.. كلشي امسلمه
بيدك.. يمضوي السمه
بيدك.. يالتروي الضمه

جنت كلك ربح
يتوقيت الفلح
اذا وجهك طلع
بده عدهم صبح

يبو فاضل الك
الضوه ابهذا الفلك
گبل لو ضلمت
يطلعونك هلك

ونست احبابه
شبگت اعتابه
والذهب ضل صيته عالي
من لزم بابه

Sample comments about this video

"اخوي هاي اغنية مو حسينية حرام مثل هذا الصوت والتاريخ ينزل هيج مستوى 🙂‍↕️"

"السلام عليك يا مولاي أبا الفضل العباس عليك افضل الصلاة واتم التسليم"

"المنشد المُفضل عندي من الطفولة حمادة💜 بس احس مستعجل ع هيج اناشيد ترى الوالدة عزيزة وماصار زمان من توفت💔"

"شهالإبداع كل مرة تبهرنا بإبداعك أكثر وأكثر، أسأل الله أن يوفقك بحق أبو الفضل العباس"

"قالت السيدة فاطمة الزهراء ( ع) «من أصعد إلى الله خالص عبادته أهبط الله عز وجل له أفضل مصلحته »"

"يحفظك وينور طريقك ويوفقك ويدوم هل حنجره الذهبيه ويخليك ويدوم حضورك الجميل ويفرحك مثل مامفرح هل الناس ابا الفضل (ع)ويعلي شأنك ويدوم توفيقك الانشوده تجننن عجزت شأكتب عن جمالها دومك متصدر انت وقصائدك وصوتك ماينمل منه الله لايحرمنه من حنجرتك وحضوورك💕"

"السلام عليك ياسيدي ومولاي يا ابا الفضل العباس عليه السّلام عاشت ايدك حبيبي احمد كلش حلو صوتك استمر بهيج إنشودة في ميزان حسناتك إن شاء الله واتمنى لكم التوفيق والنجاح الدائم وتحياتي لكم"

"اللهم صل على محمد وال محمد على هذا الابداع كل ما شاهدون هاي القصيده الرائعه من الودود الطيب أحمد الساعدي فدوه نصفي الثاني يانصفي الاول والبشر 👈🏻⚪👉🏻🕯️😁 نورت الساعدي الشاشة 🤳🏻😎😉"

"مو كل قصيدة تنسمع وبس، أكو قصايد تدخل للقلب وتسكن بالروح من جمال الصوت وإحساسه 🤍✨ إبداعك يفوق الوصف، وكل مرة تثبت إنك مبدع ومتميز بحضورك وصوتك وأدائك. ربي يحفظك ويوفقك، ويكتبلك أعلى المراتب، وإن شاء الله نشوفك بالأعلى دوم يا مبدعنا الغالي ❤️ الملا أحمد الساعدي 🌹"

"عندما تكلم عن الوفاء لايقاس إلى عند كافل الضعينه ابو الفضل العباس عليه السلام ياابو الفضل تقبل هذا القربان وجعلنا من زائرينك وتوفق أحمد الساعدي من كل النواحي مع تحياتي وسلامي من المحامية هنادي للامي 😎🇮🇶🦅⚖️"