اصبح الصبح و العين السهيره سهيره
عزتي لـ العيون اللي يطوّل عناها

كني اللي تقرقع حاجته في ضميره
ان سكت ماقضاها و ان هرج ماقضاها

اتمثنى ديار الخوف ديره و ديره
و اتوجد على اللي ضاع مني لقاها

بنت شيخٍ تفاخر به شيوخ العشيره
في ذراه الشيوخ اللي يذري ذراها

العبي في معاليق الحشاء يا الاميره
المحبه عشانك عاليٍ مستواها

لو يقولون مافي رحلة الحب خيره
قلت انا رايحٍ عقلي و قلبي وراها

سيرتي في قواسس المحبين سيره
كلها حزن فـ اولها و في منتهاها

كل مازادت المده تزود الوتيره
لين صارت مع العشاق يصدح صداها

و ان دعتني مواجيب الرجال الشهيره
اتقدم عن زحول العرب ووجهاها

ياولد عمي اشهر بالسيوف الشطيره
انت من روس شيخان العرب و اعقداها

الهقاوي كبيره و المجالس كبيره
تركم الناس من زود الحفاوه علاها

محمد النخيش

عند سلطان منصا كل دعوى عسيرة
نادر كل ربعه في فعوله تباها

ابن شيخ اليا صاب أكثر القوم حيرة
قلطوها على قصره وقصر عناها

يبشر بعز راسه من يحطه ذخيرة
يقدر يطاول نجوم السماء في سماها

يامساعد وخاضر يانقي السريرة
جبت شوخ مخالبها تضوي عشاها

صيت سلطان وأذكاره وصل كل ديرة
أشهد إن الحرار تنومس اللي غذاها

فك للجود باب وشب للعز نيرة
لين عانق سنا نجم الثريا سناها

ذخر قوم من أولها تقود المسيرة
قبل ترويض نجد وقبل يركد هواها

النخيش اسم أشهر من جبال الجزيرة
يعرفونه شيوخ المملكة وأومراها

انت شيخ المقام المعتبر وانت أميره
وانت ذخر الرجال اللي بعيد مداها

أنت عمك سعد ضاف على الناس خيره
من عطاياه كم ناس تجود بعطاها

وانت عمك سعد فعله غطا فعل غيره
وانت عمك سعد عوق الخصوم وعماها

بيني وبينكم رفقة وأخاوة وجيرة
ماتغير عسى ربي يطول بقاها

عبدالرحمن غزاي الذيابي